張家輝匿廁所唱歌無意復出樂壇
三大影帝古天樂、張家輝及吳鎮宇攜手合作邵氏電影，原來古仔與家輝於千禧年曾爭奪樂壇新人獎，前者亦成為歌影視大滿貫第一人。已棄歌從影的家輝無意復出樂壇，反而鎮宇有意與古仔穿浴袍，合唱對方的經典歌《男朋友》hehe版。
古天樂、張家輝、吳鎮宇、王君馨及袁偉豪等，昨日為邵氏電影《使徒行者：諜影行動》開工。對於古仔成為首位歌影視大滿貫藝人，眾人也戥他高興。鎮宇踢爆古仔與家輝當年曾爭樂壇新人獎，不過古仔笑言廿年前的事已印象模糊。
古仔冇歌癮
提到古仔於頒獎禮上獻聲，問到今年會否重返樂壇？他幽默說：「我諗住參加13項鐵人賽。（容祖兒話想寫歌畀你，推你做跳唱歌手。）拍戲先啦。（冇歌癮咩？）嚟緊都有兩部戲。」對於為前輩盧海鵬墊支廿萬做通波仔手術，被讚有情有義的他僅表示沒回應。提到導演林嶺東喪禮細節，身為演藝人協會會長的他表示由杜琪峯處理，並指若有需要，演藝人協會必定協助。問到是否3月舉行籌款夜？古仔指協會剛取得慈善牌照，所得善款將幫助有需要的藝人及慈善等項目。
至於曾出唱片的家輝表示無意復出樂壇：「我係鍾意唱歌，但唔敢喺人面前唱，古仔唔怕黑唔怕鬼，我唔係，唔好以為我做演唱會嘉賓就一定好雀躍，我唔想(口架)！（重返樂壇？）我成日都返，但只係喺屋企個廁所，唔習慣面對觀眾，幾十歲人啦！」
吳鎮宇恨合唱
而鎮宇則想與古仔合唱：「一定要整番首《男朋友》，着浴袍嘅hehe版，搵埋張家輝，佢出過唱片嘛。」