余德丞上山下海驚頂唔順
藝人余德丞昨日出席商場活動，消瘦不少的他透露有健身及接受重量訓練，暫時未能踢波，即使身體狀態尚可，但比以前更容易疲倦：「之前去日本拍嘢都好易攰，有時想瞓吓晏覺，好在劇組好好，間唔中安排到45分鐘都會叫我休息，嚟緊會再出埠拍嘢，同事都話如果我頂唔順要出聲，到時都要上山下海。（幾時拍得劇？）短時間都唔會住。」
席間他與小朋友DIY製作足球機，問到會否DIY禮物？他說：「我整嘢唔叻。（收過女仔DIY禮物？）第一個女朋友織頸巾畀我，到依家都有好好保存。（叫緋聞女友蔡思貝織頸巾？ ）佢識唔識o架？似我識多啲。」