餵朱晨麗食包何廣沛畀蕭正楠玩殘
藝人張兆輝、蕭正楠及何廣沛昨日為無綫劇集《黃金有罪》開工，拍攝在半山跑步的戲份，沒料等埋位之際，「小鮮肉」何廣沛已被現場蚊螆咬到成手蚊瘌，認真慘情！不過在旁的阿蕭未有可憐他，還取笑他近日餵緋聞女友朱晨麗食漢堡包的新聞，令對方無力招架，只說：「都係正常食飯睇戲，咁啱佢想試吓我個包係咩味，一時冇手先餵一餵。」因何廣沛已第二次被拍到與朱朱餵食，阿蕭即抵死說：「佢真係好鍾意餵人食嘢，我有睇條片。」
張兆輝讚好仔
對於阿蕭連番取笑何廣沛，張兆輝聽到𢱑晒頭，經講解才恍然大悟，並起勢激讚：「原來係咁！其實呢啲榜樣唔係度度有，好難得咁細心，係好仔嚟o架！」
此外，阿蕭被問到太太黃翠如於元旦在社交平台放閃，笑言想大家開心：「張相影咗好耐，有時值得紀念嘅日子都會影，不過以前低調，依家公開晒就發晒出嚟囉！（預告之後仲會有再甜蜜啲嘅相公開？）冇啦！唔通又餵食漢堡包咩！」
而與已故導演林嶺東關係友好的張兆輝表示，連日來忙於為劇集開工，未能協助辦理後事，若時間許可會出席喪禮：「佢係我好好嘅朋友、師兄，亦係一位好導演。（呢幾日有冇聯絡林嶺東家人？）我太太同佢太太有聯絡住，有慰問嘅。」