香港金像導演林嶺東早前離世，震驚影壇！曾與他合作的好友作家沈西城接受本報訪問細說從頭，更大爆當年拍攝《龍虎風雲》，女主角原屬鍾楚紅（紅姑）！
身兼《龍虎風雲》編劇與演員的沈西城表示，對上一次與林嶺東見面已是2017年中，當時林由上海回來，於是約出來飲咖啡傾偈。他表示林在上海居住了一段時間，對電影仍非常有熱誠。他透露二人早於1978年已認識，計起上來已有40年！據沈西城表示約80年代中，他在新藝城時，林嶺東叫他幫手度橋，當時剛巧發生忠信錶行劫案，他很清楚案件背後的來龍去脈，於是提議拍成電影，並獲得通過，《龍》片就此誕生。
雖然落實開拍，但卻遇上重重困難！沈西城說：「當時《龍》嘅製作費唔多，周潤發都係友情價，當時我哋好想搵鍾楚紅做女主角，但麥Sir（麥嘉）都話唔好，因為片酬太貴，所以搵咗吳家麗演。阿東亦叫我演其中一角，慳製作費嘛！」林嶺東出名拍戲認真，沈西城亦承認對方太搏命，不顧及工作人員安全，他說：「阿東一埋位就入晒戲，變成緊張大師！原本係好事，但佢有弊病就係唔係好留意身邊工作人員嘅心態，太搏命！所以工作人員對佢會有微言，搞到有啲人冇法頂得順佢嘅作風。」
另外，王晶前晚拍攝電影時談到林嶺東，他感觸地說：「有人同我講9號設靈。（有冇聯絡林太？）冇！我又忙又唔知講乜好。如果佢哋有需要，我一定會幫手。」