子丹縮胸凸腩自誇仲係靚仔
甄子丹在新片重現經典打鬥場面，雖然自爆胸肌縮水兼有健康肥腩，但着番舊戲服依然啱身！
甄子丹前晚與伍允龍為電影《肥龍過江》於九龍灣拍攝煞科戲，他表示該場口是以搞笑手法，將自己15年前的經典作《殺破狼》場面重現：「喺同一條巷，着番同一套衫、揸同一支棍。（件衫仲啱着？）啱！仲鬆咗！因為胸肌冇以前咁大，反而肚腩肥咗，係健康肥。」他表示還會玩轉《導火綫》，自己玩自己搞笑一番：「不過套戲唔係完全喜劇，我唔識胡鬧，呢個交畀拍檔晶哥（王晶）。我同佢合作咗三部戲，分擔唔同崗位，套戲拍咗一年，我哋邊拍邊改。」
肥仔造型 仔女認唔出
提到戲中的肥仔造型，子丹笑言是靚仔肥仔：「幾年前製作過一個廣告，就係肥仔造型，出街後啲朋友話可以將呢個角色變為電影。（太太鍾意你個肥仔造型？）啲小朋友唔認得我，仔女嚟探班唔知邊個係老竇。」
有份投資兼主演的王晶表示製作成本不菲：「有半套以上嘅戲喺日本拍攝，又喺廠搭建咗條歌舞伎町。（你今次過足戲癮？）丹爺（甄子丹）叫我演呢個角色，喺戲入面打到死，我哋兩個夾埋打幾十個，佢打幾十個，我打幾個，唔打唔知咁好打。」
