「B仔」腳頭好城城愛駒初戰即Win

城城2017年與內地女模方媛拉埋天窗，同年榮升爸爸，日前他於海南島國際電影節奪得「年度男演員」獎，昨日喜上加喜，其愛駒「舞士精神」更於2018年最後一次賽馬日中，由冠軍騎師潘頓出戰四班一千米最短途，以2.6倍大熱門姿態跑第一，為城城帶來逾36萬港元的馬主獎金。

全程拖實方媛

昨日城城與大肚方媛帶囡囡Chantelle現身馬場支持愛駒，穿大褸包到冚的方媛難掩肚凸凸身形，久未露面的她更貪靚穿上1.5吋有踭鞋，老公即化身「超級暖男」全程傍實兼十指緊扣，全天候貼身保護老婆，而囡囡則交由女傭照顧。見Chantelle眼仔睩睩勁精靈，全程伏在女傭身上。

郭富城、方媛 「一家四口」入場被嗌錯Leon	拖實老婆的城城，睇比賽時手舞足蹈出力嗌！	城城女兒由女傭抱實進場。

賽事開始時，城城於看台攬實老婆觀戰，直至最後400米，他睇到咬牙切齒，投入得不停大叫「Come on baby」，方媛亦肉緊除下黑超，最後愛駒衝線奪冠，城城即激動得與經理人小美擊掌，並與太太深情擁抱兼高舉V字手勢，又不停向現場觀眾揮手，然後再拖老婆到凱旋門拉頭馬。他影相時全程四萬咁口，相當風騷。愛駒大熱奪冠，為城城帶來逾36萬馬主獎金，但他接受訪問時坦言賽前未有太大信心，只以平常心面對，故未有落重注，只買了數千元「例飛」。

帶囡囡學策騎

他說：「比賽形勢有好多變數，所以都冇特別期望。不過呢匹馬我初初見到已經好鍾意，而且今次佢第一次比賽，喺馬房一出即勝嘅馬唔多，相信喺賽馬歷史上係一個好好嘅回憶。（仔女好旺你？）係呀，太太同小朋友都有嚟，頭先喺上面都玩得好開心，囡囡見到啲朋友都好活躍。（咁旺你會唔會多啲帶佢嚟？）等佢再大少少先啦，不過我將來都可能會帶佢學策騎。」又透露與家人食飯慶祝後，即往內地為巡迴演唱會作準備。

另外，城城入場時發生小插曲，有馬迷要求合照時，誤叫他做「Leon」，他聽後表現淡定，禮貌回答：「我係Aaron。」展現出風度一面。