著名導演林嶺東猝逝，人緣極佳的他令不少圈中人大感可惜及愕然。
導演林超賢：點解會咁突然？佢係我偶像嚟嘅。我拍《線人》嘅最後一場學校廝殺戲，係向佢嘅《學校風雲》致敬嘅，當時我同張家輝講好鍾意林嶺東，家輝就幫我安排同佢見面交流。我成日都同人講，話想同佢合作，依家真係再冇機會，好遺憾。
曾與林嶺東合作電影《迷城》的余文樂，在社交網甫出一張林嶺東黑白照，留言：「太突然，實在是太突然了……我不知道該怎麼反應，導演一路好走，永遠愛你，敬佩你……」
曾拍林嶺東執導《屍氣迫人》、《奇逢敵手》的杜汶澤，得知林嶺東逝世後大為傷心，於社交網站發文悼念，指他所行導演之路，是深受林嶺東影響，寫上：「永遠不會忘記和你合作時在拍攝現場時對我說過，如何才能把電影拍好。」
黎耀祥：我對佢印象都幾深，因為十幾年前我拍過佢部《目露凶光》，嗰陣時我哋都係小朋友，出去拍戲唔係好多，佢教識咗我好多嘢，當年佢幾欣賞同鼓勵我，年幾前佢再搵我拍嗰套《冲天火》，雖然唔係咩重角色，但佢會記住搵番我去客串，對我嚟講係好大鼓勵。
王晶數月前曾與林嶺東飯局，當時並沒異樣，十分壯健，王晶說：「冇理由，我死佢都未死，不過人過六十好難講，我同佢太熟，聽到呢個消息都唔信，好難過！」