胡鴻鈞頸現香艷「咖喱雞」

歌手胡鴻鈞（Hubert）與謝文欣（Ally）昨日到屋邨出席活動，二人分別在台上獻唱及與小朋友合照，Hubert又走落台與粉絲近距離互動，展現親民一面，大受街坊歡迎。問二人如何度過聖誕節？Hubert說：「同朋友燒烤，打牌仲贏咗40蚊，不過我哋打好細啫！」期間記者發現他頸上有疑似「咖喱雞」的紅印，他即解釋是沖涼時太大力刮傷自己。而Ally透露與家人食大餐是每年的傳統活動，並笑說：「真係食到想嘔，唔知點解食極都唔飽！」Hubert聽到後即開玩笑：「我真係恭喜你呀！你係咪要去Body Check？」