曹永廉怕養唔掂日日苦口苦面

「久休復出」的田蕊妮昨日與曹永廉、李思捷等現身銅鑼灣一間健身院，拍攝無綫新劇《她。她。她的少女時代》，劇情交代飾演健身教練的阿田瞓身為思捷操肌，見她以Bra Top上陣大晒小蠻腰，身形弗爆。

阿田免費「上堂」

扮演雙失中女的她笑說：「劇中以為自己好幸福，突然間失婚又失業，搞到要上人生課程，都多喊戲。嗰段戲拍咗4、5日，所有演員都冇對白，自己上台講親身經歷，個個講到喊晒，原來我身邊啲助手同髮型師，全部都上過類似嘅課程。我覺得拍完呢場戲，自己好似免費上咗人生課程咁，抵晒啦！」

事業愈來愈順

至於曹永廉飾演小男人，日日被「老婆」阿田鬧，甫開場已交代雙方鬧離婚：「今次個劇本好貼地，講緊香港人嘅中年危機。（你嘅中年危機又點？）我都未到中年，青春期咋！好記得當初太太有咗大仔嘅時候，我擔心到失眠兼唔開心，成日憂慮日後嘅生活，唔知自己養唔養得掂頭家，好彩兩個細路仔出世後，我嘅事業愈嚟愈順利，起碼唔使擔心錢銀。」

他笑言兩次當爸爸都是「意外」﹕「超出計劃，不過後來我就同自己講，如果成日苦口苦面，財神見到我都走啦。（聖誕冇得陪家人？）冇所謂，我都送咗禮物。其實仔女好想去見真雪，依家諗緊可唔可以攝到幾日時間，同佢哋去玩吓。」

阿田揭開件衫，誘李思捷努力操肌。

阿廉和阿田鬥舉啞鈴。