李亞男開刀誕女 祖藍擔心：太似我

祖藍昨晚於葵涌演出舞台劇，休息期間會見記者。剛榮升父親的他心情興奮，但因養聲關係，細細聲受訪。他透露女兒Gabrielle於17號出生：「因為要就我做舞台劇入台，所以要揀時間開刀。爸爸嘅演出決定咗BB嘅生日，好難忘，真係唔好意思。」囡囡重7.1磅，相當健康。祖藍笑言：「生產過程醫生播住《每天愛你多一些》，十幾分鐘就搞掂，我喺產房感覺好似陪太太做水晶甲咁啫。（剪臍帶？）係咁意剪咗，因為開刀時醫生其實都剪咗。」

手長腳長唔敢抱

他形容女兒皮膚白滑，手長腳長，眼睛似媽咪：「不過弊傢伙，鼻同嘴似我。聽講女大十八變，我會幫佢祈禱，希望愈嚟愈似媽咪。大家好擔心佢似我？我都好擔心呀，但相信似媽咪嘅。」祖藍未幫女兒改中文名：「佢喺媽咪個肚一聽音樂劇歌就有反應，我想幫佢改個相關嘅名。英文名媽媽改嘅，意思係『從天上來的天使』，太高貴嘞，好似要着西裝叫佢先得！」

祖藍又表示女兒出生近一星期才敢抱：「好驚抱起佢我就喊，要養聲，所以完成舞台劇演出後，我會好好喊番場。（老婆情況如何？）開完刀仲痛緊，要食止痛藥。佢望住個女好開心，餵母乳，我覺得自己冇娶錯老婆，佢係個好媽媽。」

王祖藍、李亞男

「藍男」在社交網晒囡囡手仔報喜。

半年後再追多個

問到打算送甚麼禮物給太太，祖藍表示：「坐完月同佢去日本食魚生大解放，佢成年冇食過。（到時唔捨得囡囡？）新潮父母有小朋友都要拍拖嘅。（再追多個？）聽講開刀要半年後，我想快啲，因為老嘞。（追個仔？）聽天由命。」