祖兒冇貨賣提前收爐
天后容祖兒與內地名模奚夢瑤昨晚到尖沙咀出席時裝活動，祖兒透露其慈善二手衫Pop Up Store暫時沒貨，要提早收爐：「好開心反應咁好，會搵啲大褸出嚟賣。（再去鍾欣潼屋企摷？）應該摷多兩次都仲有，不過佢忙到癲咗，夾硬抽時間做呢件事。張敬軒都話畀我，但未畀，係咁走數！佢好忙，啱啱成立咗Marketing公司，你話佢搞咩吖？乜都畀佢撈晒！」又自爆司機剛剛撞車，幸好人沒事：「我唔喺車，之後就Call車過嚟。」問到如果未能Call車，可會坐港鐵？她笑言：「我未搭過港鐵，不過真係諗過搭。」
另外，祖兒早前在內地舉行校園巡迴演唱會，最後一站在北京清華大學舉行，好友霍思燕偕兒子「嗯哼」撐場，她說：「好多朋友都覺得我係工作狂，但對我嚟講，只要同音樂有關，工作都係一種享受，如果可以通過音樂，令更多人從中得到能量，就係我最大快樂。」
