胡鴻鈞娶劉佩玥冇得錫嘥料
歌手胡鴻鈞（Hubert）首次在新劇擔正男一，更包攬主題曲、插曲及片尾曲，成為「劇集歌霸」，他與劉佩玥（Moon）三度結片緣，今次終修成正果做夫妻，但依然冇得錫錫！
Hubert甚有觀眾緣，2016年拍首部劇集《殭》，表現備受好評，之後拍《降魔的》演「石敢當」，令他人氣急升，今次在《救妻同學會》升呢做男一，他未有驕傲，謙稱：「劇入面其實有好多演員，大家都係一樣重要，冇話邊一個男女主角，因大家都有自己故事，缺少一個劇本都唔完整。」
三度合作有默契
提到第三次與Moon合作，今次終於結為夫妻，他笑說：「係呀，所以啲網民咪話我哋終於修成正果囉。由《殭》對佢嘅欣賞，到《降魔的》都係我單方面迷戀佢，嚟到《救》劇終於做夫妻，希望粉絲睇得開心。
問到想不想與Moon做螢幕情侶？Hubert說：「冇刻意，因為係唔同監製，可能覺得我哋有默契同火花啦。除咗拍劇，我哋仲合作旅遊節目。」又笑言與女方飾演夫妻，但沒有親熱戲：「嗰種Sweet係挨吓膊頭拖吓手咋。（你好似鬆一口氣？）我專登同導演講，盡量唔好安排不必要嘅親熱鏡頭。」問到是否不想拍咀嘴甚至床戲？他說：「對我嚟講真係高難度，可能會尷尬同唔自然，所以盡量唔好。（挑戰演技嘛！）咁好多方法可以挑戰嘅，除咗所謂親熱戲外。」
又演又唱最開心
提到《三國機密之潛龍在淵》和剛播畢的《是咁的，法官閣下》都是Hubert唱主題曲，他說：「首先我錄歌時唔知個劇幾時播，只知係唱主題曲。」而《救》劇於周日播映，所以之前幾乎每日開電視都聽到他的歌曲，他靦腆說：「可以為自己演嘅劇集唱係開心嘅，今次片尾曲都係自己寫，所以更加有意義。（雄霸劇集歌喎！）真係好難答，多謝公司畀機會我。」