曾樂彤最怕贏獎冇得撈
現年24歲的網紅曾樂彤投身樂壇，多得同門蔡卓妍及陳家樂等提攜增加演出機會，爭新人獎勢坐亞望冠，但年賺七位數的她卻擔心隨時「冇嘢撈」！曾樂彤5年前在YouTube開設個人頻道，主打美容化妝、旅遊Vlog吸睛，最受歡迎影片點擊率高達32萬，大學時期已「收兵」16萬，廣告收益賺到笑！明知唱片業走下坡，她卻偏偏捨易取難，簽約英皇以歌手身份追音樂夢，被稱為「逆流女神」。
狂接廣告吸金
由網上轉做幕前，她坦言要學識取捨：「係會少咗好多以前YouTuber嘅收入，但係多咗資源。以前自己一腳踢，依家我專心做好表演就得啦，仲有今年我賺到嘅經驗同識到嘅人，唔係用錢衡量到，所以冇特別去諗得失呢個問題，係諗點樣做好自己畀多啲人識，我相信呢啲係投資。」其人氣持續高企，一年就接了8個廣告，包括服裝、護膚品、保險、女性用品及隱形眼鏡，「水頭」充足，難怪她也鬆一口氣：「整體感覺同生活水平，其實冇好大分別。」
張敬軒出手打救
曾樂彤認為入行最大收穫是圓歌手夢，在唱片市道低迷下，依然可以推出實體碟：「年底公司為我出隻碟，係送畀我嘅出道禮物，諗都冇諗過第一個MV可以去台灣拍，仲有成年唔同嘅宣傳！我好實際咁諗，投資都唔細，好感恩，但同時都驚驚哋！」問到怕甚麼？她說：「聽講做新人時機會都比較多，但第二年就係另一番景象，所以唔驚就係呃人，我都怕自己冇得撈。」幸而她感迷茫之際，師兄張敬軒答應若時間許可，會擔任其新歌監製，她坦言：「發夢都冇諗過！我諗公司對我今年表現尚算滿意，所以先有呢個彩蛋！」
