城城20年珍藏搞車展晒冷！
愛車如命的藝人郭富城（城城）早前豪擲近千萬購入限量超跑，他昨日在活動上透露收藏名車近廿年，最大心願是舉行名車展大晒珍藏！
城城、楊千嬅、李佳芯及黎諾懿昨日現身活動，提到城城豪買限量跑車，他稱是一個投資：「架車叫冼拿，係一代車神嘅名，紀念佢而推出，我都係佢粉絲，覺得好值得，架車掂住千萬，我都諗咗好耐先買，認為可以保值。」他坦言收藏限量版名車已有二十年，當中有比該新車更名貴：「我個心願係有一日將啲收藏開一個展覽，將收益撥捐慈善，回饋社會。（幾時開展覽？）唔會咁快，有啲車要到2020先出產，我未收集齊。」
城城指其收藏有人幫他管理，反而家中的停車場以家庭車為主，最多七座位，問到何時才坐滿七座位？他笑說：「盡快。（有好消息可以公布未？）順其自然，多謝大家。」他謂為人父親後，希望有更多子女陪伴：「如果自己百年歸老，兒孫滿堂會好開心。我依家盡量Keep好狀態，睇住子女成長。呢一刻積極工作，成為一個好爸爸令我更有動力。」
黎諾懿追女「造緊嘢」
至於黎諾懿透露今年拍了八個廣告，非常開心，獎勵太太送了綠寶石作為結婚周年禮物，希望明年可以送大粒啲，同埋想生個女，依家已經「造緊嘢」，全力以赴。
另外，藝人黃宗澤（Bosco）早前拍攝邵氏網劇《飛虎之雷霆極戰》時左腳受傷入院，今日生日的他表示會在家中靜養過生日。而該劇監製樂易玲在活動上指Bosco需等數星期才可拆石膏，問到對劇集進度有否影響？她說：「會有調動，睇吓佢進展點，會跳拍佢嘅戲份，或者拍咗佢嘅文戲先。」