同劉穎鏇「車震」有手尾 胡㻗被照肺！

胡㻗、羅天宇

藝人羅天宇與同母異父的弟弟胡㻗昨日帶同愛犬出席活動，提到早前被拍得與劉穎鏇摸黑「車震」，胡㻗直言公司有找他「傾偈」：「依家大家都係工作為先，件事對佢都好大打擊，唔想影響到佢。（有發展機會？）唔知！等大家事業穩定啲先諗。（你對佢有冇意思？）好多人都鍾意佢，佢好Nice，係個好女仔，大家都保持聯絡。（以後唔敢再車佢？）會避忌啲，唔好畀人誤會。（公司棒打鴛鴦？）唔清楚，我哋仲係好好朋友。」

羅天宇籲湯洛雯小心

至於羅天宇對前女友湯洛雯被傳與姚子羚舊愛鄭子邦撻着，他代為澄清：「據我所知唔係！如果佢搵到幸福我都開心，我哋都有聯絡，大家仲係朋友。（叫佢保護好自己？）係要小心啲，佢都好唔開心畀人咁講。（你哋有冇機會復合？）唔知，問題唔係咁易解決。」

Jessica C.準備舉家返美過白色聖誕。	胡㻗與劉穎鏇密會斷正，為保事業轉玩避忌。	龐卓欣

• 龐卓欣與王麗嘉帶埋愛犬撐場，順便分享養狗經！

JC享受做家庭主婦

同場還有名模Jessica C.（JC）、龐卓欣及王麗嘉，JC透露聖誕將返美國探親：「個女好想睇雪，因為佢好鍾意《魔雪奇緣》，成日喺屋企扮Elsa。（依家做家庭主婦定想做番嘢？）我好享受做家庭主婦，另一方面都會想做嘢，但覺得屋企始終要有人照顧小朋友，好似今日我出嚟，老公（安志杰）睇住屋企。」