周柏豪孭起頭家學懂父子情
歌手周柏豪日以繼夜拍劇下，早前捱住眼瞓為新歌《老少平安》拍MV，請來好戲新人王凌文龍化老妝演「老竇」，柏豪回憶童年時與父親聚少離多，自愧不懂得尊重父親，現時孭起頭家才體會到箇中苦況。
柏豪通宵趕完劇，冒住狂風暴雨為新歌拍MV，首次與凌文龍合作，他說不擔心被對方搶Fo：「請得佢嚟就係要佢嘅好戲，我演繹做仔嘅角色，佢飾演阿爸係故事嘅靈魂重心，仲有兩個小演員，一個係十幾歲嘅我，一個係6歲嘅我，喺全家福鏡頭入面縱橫交錯出現。」
珍惜與父母相處
MV是講述父子情的創作故事，他慶幸現實生活中一家人齊齊整整，與MV內容相反：「首歌係講一生有幾多次可以一家團聚，出去工作，少一日就少一日，見多父母一次即係少咗次，人愈大就會不斷諗呢啲問題。之前婆婆離開同身邊有啲朋友離開，就諗到時間過得好快，家人唔會一世喺你身邊，更加要好好珍惜，唔見面都要打電話慰問一下，做好本分。」
童年時，柏豪父親在內地工作，每星期才回家兩日，所以他跟母親感情較深，覺得媽媽辛苦照顧他們，加上看不到爸爸辛苦工作，故細時只尊重媽媽：「我對爸爸嘅感覺係佢辛苦都唔會話畀我哋聽，佢唔開心或者有乜生意上麻煩，都唔會帶返屋企，呢樣嘢，到自己賺錢養家先體會到。」
食飯都影全家福
現時是大忙人的他，陪伴家人時間不多，就教家人用視像及WhatsApp聯絡：「去外地做騷就帶埋佢哋，當去旅行又可以陪吓我，如果等我返屋企食飯，真係一年先得一兩次！咁佢哋鍾意去街，阿媽一年去十次旅行，我喺香港有騷佢先唔去，佢哋話趁行得走得，去睇吓呢個世界。」他說一家人會像MV一樣，每年拍一張全家福：「唔止新年，阿媽要求每次食飯都要影，唔記得影阿媽會鬧㗎！」問到周媽媽期待新成員加入？柏豪即以笑回應。