英國辣妹成員Mel B近期與隊友合體開騷掀撲飛潮威到盡，不過43歲的她於自傳揭難忘離婚傷痛，曾吞服200粒丸仔自殺，又吸毒麻醉自己，並暗示約8億港元身家被前夫控制，婚變時僅剩約7,000多港元，認真陰公！
Mel B與監製Stephen今年8月正式結束10年婚姻，但仍就子女撫養權而密密出口術攻擊對方，連環爆是非。她近日推出自傳坦蕩蕩自揭秘聞，當中提及多年的不愉快婚姻：「我當時好悲傷，簡直就係失晒控。」為了應付歌唱比賽真人騷節目《X音素》（The X Factor）的評判工作，她自爆有段時間每朝吸兩行可卡因才開工：「之後我就祈禱：『上帝，我好抱歉吸食可卡因，但求主幫助我度過這日子。』」她指吸可卡因後，抑鬱情況更嚴重，並永久性產生焦慮不安，心理健康大受影響！
Mel B亦講到入行多年曾吸金約8,000萬英鎊（約8.04億港元）：「當我認識第二任老公（Stephen）時，我有大屋，洛杉磯有物業，仲有好好嘅事業，我離開佢時銀行就只有約729英鎊（約7,329港元）。」暗指多年來被對方陰乾血汗錢，但未有講明細節。她還表示一生中最愛是前男友愛迪梅菲（Eddie Murphy）！
此外，自傳中提到她2014年12月曾服止痛藥自殺：「每啪一粒，我就問自己：『你係咪肯定（要自殺）？』之後再啪20、25、100粒。當服用200粒後，我又問：『Melanie！你做乜X嘢？控制吓自己啦！』自殺並唔係答案，我唔可以唔重視自己嘅生命，我一定要去醫院。」最後她於藥物影響下盡力撞開門：「大家三日後於《X音素》睇到我面部同膊頭嗰啲瘀傷，大部分都係嗰次撞門整到。」當她清醒時，已身在醫院被醫生及護士包圍，又指當時所有辣妹隊友都有致電問候，惟她未有勇氣回覆。