楊文蔚Cosplay誇得起！
「跳高女神」楊文蔚與「女飛魚」歐鎧淳同樣由體壇殺入娛樂圈，初入行已成為各大品牌爭相合作的寵兒，對於經常被人與歐鎧淳比較，她說：「佢正經啲，我就調皮啲！」
24歲的楊文蔚於2017年台北田徑公開賽一躍成名，之後更跳入演藝界，短短日子不斷出席品牌活動兼拍廣告。
她笑言現時生活猶如角色扮演，相較跳高不斷訓練的日子，覺得更好玩：「我好鍾意挑戰唔同嘅嘢，好似之前拍廣告咁，可以試到好多平時唔會做嘅誇張造型，係個新嘗試，好似有次要戴唔同顏色嘅假髮，又金又紅，初時有啲唔慣，但慢慢就覺得出席唔同場合好似玩緊Cosplay，感覺好得意。」
兩者好唔同
她的名字經常與歐鎧淳相提並論，楊文蔚認為大家形象截然不同，不怕外界比較：「佢早啲入行，係資深啲嘅前輩，而且畀人感覺正經、文靜啲，我就活潑啲，成日喺鏡頭後面跳跳紮，大家Style好唔同。（你哋私底下識唔識？）有見過面，唔係太熟，但都有傾吓偈。」
豬籠入水想買車
問到工作量大增是否豬籠入水？她大方承認收入有增長，故分別買了保險及入股媽媽公司作長線投資，並搞笑說：「如果唔係咁，擔心自己會亂使錢，因為我一向欣賞靚車，心郁郁想買番部，但知道養車好貴，加上自己成日唔喺香港要去第二度比賽，所以都仲係心大心細緊。」
