龐景峰Rambo上身跳火欄爬泥地勇！
熱愛武術的藝人龐景峰運動細胞爆燈，上星期六在港參加既激烈又困難重重的斯巴達障礙賽，赤膊晒肌上陣的他打扮似足Rambo一副戰鬥格，他說：「平時玩武術、又鍾意飛車，Rambo都會喺入面，呢個比賽項目好似軍訓咁，有布滿荊棘嘅鐵絲網，我哋要趴喺泥地爬過去，又要爬吊喺半空嘅麻繩，難度好高。」
他指今次是應活動贊助商邀請代表香港出賽：「我今次參加咗兩項，一個係早上精英賽，要跑12公里，主要想挑戰自己過往成績；另一個係下午跑6公里，有來自世界各地嘅選手一齊比賽，我係五位香港代表其中一位，雖然大家唔識大家，但好有團隊精神，過關卡時會互相支持。」他指精英障礙賽跑道長12公里，設有35個障礙關卡，要攀爬高牆、搬運重物、投擲長矛、泥濘中爬行、跳火欄、舉50公斤的壓力波等。問到比賽期間有不少碰撞，有否需要加強保護「小峰」，他說：「冇喎！為咗方便，我仲只係着住泳褲出賽。」
維園「開班」授徒
龐景峰透露已是第六次參加，自己亦有組隊，平時會在維園練習：「我個團隊有13個人，佢哋都係打工仔，我平時會喺維園開班教佢哋，以自己經驗分享畀佢哋知，又教做掌上壓、點樣練肌肉等佢有多啲爆發力、點樣喺地上爬得舒服啲等等。佢哋今次都有參加，成績OK，但最重要係挑戰自己，雖然比賽搞到周身傷痕，但唔係好嚴重。」他笑言雖已事隔幾日，但依然周身骨痛。
