江嘉敏飛車逃命屁股受罪
藝人黎耀祥、江嘉敏及高海寧等在台灣拍攝新劇，祥仔、陳豪動作戲多多，而嘉敏拍攝一場駕駛電單車的戲份時「扽」親「八月十五」，她笑言幸好此行吃多了，應該夠肉地「墊底」！
黎耀祥、高海寧、陳豪、江嘉敏及李佳芯等現時身在台灣拍攝無綫劇《殺手》，祥仔與陳豪去到當地依然是最辛苦的兩位，陳豪要揸電單車拍動作戲，祥仔稍後更要拍攝一個打十個的場口！江嘉敏與高海寧等雖然動作戲不多，但嘉敏自爆拍攝一場跑戲時跌倒，屁股受罪：「唔知點解我拍《兄弟》同《殺手》都同啲動作戲冇乜關係，但有一場戲畀人追殺，因為台灣落雨，我跳上電單車時唔小心跣腳『扽』親個Pat Pat，可能我比較論盡，佢哋覺得我唔係好適合動作場口！」又透露有場戲要用很差的語氣對江美儀和黎耀祥說話，但面對兩位「戲場」強勁的前輩，笑言要很大勇氣！
黎耀祥一個打十個
嘉敏出名是「零食王」，此行亦大快朵頤，食得最多的是豬扒和雞扒：「呢度啲便當真係幾好食，裏面有3、4樣餸，飯都食多啲！我有行夜市，珍珠奶茶當水飲，磅重又冇乜點變，但視覺效果有啲肉地，之前返香港宣傳《兄弟》着番戲服，身材係比之前豐滿咗嘅！」而黎耀祥坦言此行好歎，可以與太太食勻台灣美食：「動作戲方面仲未開始最辛苦，最辛苦係最後一日，講番我10年前一個打十個！」
高海寧歎住開工
至於高海寧坦言輕鬆，有機會去北投浸溫泉，又去十份放天燈，她笑說：「真係食肥咗！每日都飲幾杯珍珠奶茶，一路行一路食，又食麻辣火鍋，又試食檳榔，不過唔啱我！」並笑言購物買到爆篋！而李佳芯有一場捱打戲，她說：「我都有啲追逐戲份，有場講得罪人，畀人叉頸同仆落樓梯。我條線係較為輕鬆嘅，但面部表情同動作方面都要好誇張。」