48歲宣萱吸晶大法催「情」搵Mr.Right

藝人宣萱去年在無綫劇《不懂撒嬌的女人》飾演女強人「Mall姐」深入民心，還為她贏得馬來西亞視后榮譽，現實中的她亦是一位事業型女性，為保持最佳狀態，勤力做運動Keep Fit兼保持心境開朗。出道以來戀情多多的她，男友無分國籍貫穿中西，可惜沒有一段能開花結果！自從兩年多前與意大利籍男友Fran分手後，她的感情至今仍是一片空白，早前接受訪問時雖表示享受單身生活，不心急拍拖，但仍希望找到個啱傾啱講、可以溝通的真命天子。

攞埋「秘笈」搵法寶

默默等待不是辦法，宣萱終於主動「出擊」！日前下午約4時，她被發現戴着太陽眼鏡、一身Casual打扮獨自現身銅鑼灣，手戴水晶鏈的她急急腳步往該處一間佛具店，店內擺放着不少風水擺設，門口亦掛着大小不同的葫蘆。甫入店內，她即除下黑超，並從手袋拿出一本記事簿「秘笈」查閱，期間向店員詢問，看來是一心大擺「風水陣」催旺運程！其後，宣萱一臉認真於店內左揀右揀，還「自由行」上身，踎低細心揀選心頭好，期間又拿起一個水晶球研究，並向店員「問到篤」。轉個頭來，她又往睇催旺姻緣的粉紅水晶，不停在店內氹氹轉掃貨，就連被顧客認出眼望望亦未有理會。

Dry爆嘅宣萱買包「口立濕」潤吓，單手摷袋畀錢勁狼狽。

狂捽水晶球 宣萱拿起水晶球不停研究，唔通從中睇到未來男友？

掃大盒戰利品

逗留半個多小時，宣萱成功搜購一大盒「心水」擺設離開，沿途小心翼翼，親手捧着戰利品，同時要低頭撳電話，邊行邊覆語音短訊，看似十分忙碌。揀到攰攰哋，她步往附近涼果店買「口立濕」，繼續邊講電話邊摷手袋，相當手忙腳亂，袋中物件幾乎跌出來，狀甚狼狽！買完涼果後，她再到餅店購買西餅，然後匆匆往附近停車場取車離開。

明年緣機到

48歲依然單身，堪輿學家陳子才指宣萱的命格五行屬陽金，從玄學角度分析個性比較剛強、倔強、不喜歡妥協，由於較缺乏安全感及事業心非常重，故曾錯過一些重要姻緣：「2013年後隨住心態嘅轉變，佢會行20年財運或旺夫運，但如果太過注重事業，愛情運自然會被削弱！」又指她今年感情宮位有相合的現象，明年更有正桃花星，可能有比較能相處溝通的對象出現。問到透明水晶的作用，子才指透明水晶多為金髮晶，主要用作催旺財運。