鄧麗欣施襲陳凱琳加墊防護
藝人鄧麗欣（Stephy）與陳凱琳（Grace）在電影《起底組》飾演兩姊妹，有不少鬧交場面，Stephy自爆被對方突然爆粗嚇窒：「我哋嘅第一場鬧交戲，佢無啦啦爆粗，劇本本身係冇，導演刻意唔話畀我知，想嚇我，點知真係嚇到，第一次聽佢講粗口，我以為自己聽錯。」
加鬧交戲
Grace笑言拍完後，Stephy即反問她剛才是否講粗口：「導演事前有問我講粗口得唔得，我問佢要講幾多隻字，佢問我可以講幾多，我話不如一隻字先，我哋慢慢嚟。（嗰場戲多唔多NG？）拍咗幾個Take，唔算好多，我唔想講慣嗰個字。」Stephy表示希望加重姊妹情，故要求加多一場在天橋的鬧交戲：「可能鬧上癮，覺得好過癮。」
除了鬧交外，兩人也要「互毆」。Grace笑指曾開玩笑表示要在衣服內加墊防撞瘀，Stephy則指對方身材纖瘦：「我成日怕佢對手會斷，真係好驚，推撞完之後飛去兩呎遠，唔敢太大力，感覺上佢好薄，怕推走佢。」
欣賞網民
首次拍電影的Grace飾演拜金女，甚有挑戰性，她自言演出時非常擔心，因電影與電視不同，要在兩小時內交代整個故事。至於飾演女警的Stephy，與網民各以不同手法去查案，她坦言以前很怕網民：「我出道時好多抨擊，當時已經訓練咗自己唔睇評論，做好自己本分，到依家都冇特別去睇，作為藝人睇得太多會受影響。不過另一方面覺得佢哋好犀利，幾個鐘就可以起一個人底。（拍完呢套戲對網民印象改觀？）係，佢哋係叻仔，唔係淨係宅男。」
場地：The Stadium（觀塘）