余安安腎上腺素爆升克服恐懼

演戲經驗豐富的余安安，唔會咁易被難倒！

余安安為宣傳護眼訊息不遺餘力，於五年前籌辦喪Z行，今次由澳門轉移到香港，獲「Fashion Walk」鼎力支持，契仔凌文龍（小龍）亦有出一分力。安安解釋為何會以喪Z行做善事：「我覺得傳遞資訊嘅嘢太嚴肅，吸引力不足，但將Idea扮成喪屍，因為喪屍睇唔到嘢，幾得意又會有Noise啲。」她雖然是搞手，卻不敢玩這遊戲，自爆有幽閉恐懼症：「好多年前去美國主題樂園玩，入去密室，點知出口壞咗，焗咗喺嗰度分幾鐘，我差啲暈，跟住就好驚，手心出汗，心跳加速。（有冇睇醫生？）呢啲係心理病，冇咩可以治理，唔知點解有。我亦曾經試過畏高，當時去時代廣場搭電梯唔敢靠窗望外面，要貼門企，有段時間好辛苦，好彩依家克服咗。」

習慣咗喊幾多次都得

安安除了拍電影，還拍舞台劇，坦言舞台劇令她更有滿足感：「電影同舞台劇各有好玩，但做舞台劇多啲挑戰，好睇臨場表現，最初做嗰時，每一晚都要維持好嘅狀態係好難，綵排時已經要攞出最好，初初唔習慣，依家練到喊幾多次都得，唔知係咪習慣。（會否好大壓力？）好大壓力，最驚唔記得對白、發台瘟，每次都會驚、會緊張，但亦因為呢個壓力，個精神要101%攞嚟演出，個集中好緊要，思維好清晰。（點樣克服？）唔使克服，我份人遇強愈強，個腎上腺（腎上腺素）一升高就爆發到出嚟，反而你唔緊張，分分鐘去咗遊魂。」

Chok出趣怪表情，非常玩得！	余安安坦言十分享受演舞台劇。	余安安與契仔凌文龍落力宣傳護眼訊息。

而小龍十分支持活動，大讚構思新潮：「令人好想去玩，我都幫咗好多年，以前未有咁大型，有幫手製作拍片。」