33E沙律不敵遊戲機焗陪男友搵情趣

張沛樂近月進軍電競界，與好友羅伊婷（Daisy）、文宥心（文荻）、林慧妍（Yen）及衛子盈（Elena）組成女子電競隊ESPrecious，主攻遊戲「傳說對決」。五女分工合作愈打愈有默契，圍埋做訪問時更嘈到拆天。

誤會隊友做小三

五女笑言打機好處多，除了是朋友間最佳的聯誼節目，更可促進情侶關係，甚至結識另一半。Daisy表示靠打機識男友：「有日我做完嘢去朋友間吧打機，隔籬有兩個男仔打同一隻Game，好似好勁咁，我就問可唔可以一齊打，第二日其中一個喺隻Game度撩我，我哋就開始傾偈。（佢係靚仔？）其實外形唔係我平時會望嗰隻，因為打機先撮合我哋。」

電競隊ESPrecious個個靚女，相信男機迷好想挑戰佢哋。	沙律覺得打機可鍛煉腦筋及反應，是很好的消閒活動。	文荻曾誤會男友打機溝女。

隊長沙律則表示跟男友林耀聲都愛打機：「記得第一次同男友鬧交，就係佢掛住打機，叫我喺隔籬就當陪咗，於是我開始練打機，依家我哋有咗共同興趣，傾偈就多咗。」至於文荻搞笑指最初誤會Daisy是第三者：「有晚聽到我男友打機，連線有個女人嗌得好大聲，凌晨兩點喎！我當然要查清楚邊個女仔，原來係Daisy，之後我哋識咗仲一齊打機，發現佢係傻嘅，咩都叫一餐。」

嫌台灣網友太宅

自小已愛打機的Elena自爆讀小六時已打機識男仔：「當時打少女戀愛Game，識到唔同男仔，但就冇約過出嚟。」至於Yen坦言約過機友出街，可惜失望而回：「試過打機打到No.1，可以去台灣同啲網友交流。（有冇靚仔？）好失望，個個都好宅。」