李施嬅殺數百演員喊100次都願

被定型演斯文靚女角色的李施嬅，成功挑戰演動作戲。

無綫花旦李施嬅去年憑美國微電影《Once More》，分別榮獲《European Cinematography Awards》及《Los Angeles Film Awards》最佳女主角，成為雙料影后的她，原來在去年底靜悄悄地在加拿大拍攝了劇集《Blood And Water》（血與水）第三季。雖然得了獎項，但一切皆是由零開始，經過多次面試，撼低數百試鏡女演員才獲得角色，她坦言滿足感好大，好似中了六合彩一樣開心：「試鏡幾好玩，監製、導演唔認識我，靠自己嘅演技、實力爭取到角色返嚟，真係好開心。」

睇得又打得

入行十五年的李施嬅漸漸被定型為斯文靚女的類型，但今次拍加拿大劇集竟然被睇中演動作角色，由黑警演到殺手，內心複雜，充滿黑暗面：「喺香港大家會覺得我啱做文靜、斯文角色，唔會諗到搵我去打、凶神惡煞、黑警、開槍駁火呢啲角色，但有人覺得我係得，希望香港會留意到，第日會有多啲唔同類型嘅角色去演，自己覺得能夠做到唔同角色先係真正演員。」

導演要求高

李施嬅指今次合作的外國導演，認真態度及對演員要求之高，令她眼界大開，她對自己的要求也提高，心裏有團火，希望快點接到新角色挑戰自己：「最難忘係臨尾一場喊戲，導演足足要求我喊咗十三次，導演想試唔同變化，我就跟住指示不斷試，佢話要做A List演員，導演要求做一百次都要做到，聽完呢句說話，我同自己講要做A List演員，每一個Take都要求做到一百分。」

演殺手的李施嬅，認真練習揸槍。	李施嬅與劇組相處愉快。	李施嬅與敵對峙，連眼神都有戲。