升格潮爸樂仔代言密密食又狂又電引爆澳門
藝人余文樂（樂仔）昨日現身澳門新濠影滙，以代言人身份出席全球首個室內全電能特技匯演《狂電派》的發布會，榮升「潮爸」的他，型格十足乘坐銀色跑車飄移出場。升格潮爸的樂仔自言感壓力，四日由上海趕至澳門出席第二個代言活動。曾拍過不少飛車主題電影的他，因為「仔細老婆嫩」盡量少拍危險戲份，飛車特技就交由專業人員負責，「樂」得做觀眾觀賞官能刺激。
樂仔於台上接受訪問，問到他是否偏好動作、賽車類題材的電影？他說：「男士天生鍾意睇車同速度感，等同女士鍾意珠寶、手袋一樣！」在綵排時已先睹為快的樂仔賣口乖大讚《狂電派》有很多高難度動作，於75分鐘內做一連串緊密表演，就像將電影場口搬上現場舞台，全都是飛車、車與車之間的合作橋段，非常緊張刺激！
電能車冇廢氣 啱一家大細
匯演中出動70款電能車，首次參與這種大型特技匯演的他覺得與電影好相似，有好多飛車效果，加上採用全電能車，能夠考慮到廢氣及環保問題，可以安心一家大細來欣賞：「家長最着重汽油味道，怕會令小朋友唔舒服，但依家所有車重新改裝過成電能車，都幾大工程，就好似重新再裝過咁。」現場展開一場精彩預演，出動四驅車、跑車、汽車、人力車、滑板車等，配合燈光做出起跳驚險動作，令觀眾嘆為觀止。
仔細老婆嫩 減少拍危險嘢
由型男變潮爸的樂仔家有嬌妻又有寶貝仔余初見（Cody），受訪時他坦言現已少接拍有危險戲份的作品，即使有動作場口，劇組人員都會特別照顧，擔心演員一旦受傷就會影響拍攝進度，笑言：「想拍都冇得拍！（變得更錫身？）如果要演出都冇辦法，反而係媽媽一向都唔鍾意我拍危險戲，但真係要做嘅話都要做。（太太呢？）佢就冇話嘅，好少會講，但如果要拍啲危險嘢都會陪我，其實佢今日都有嚟，但如果太遠、太長時間就未必陪。」
講到囝囝，樂仔都忍不住冧笑，坦言未習慣爸爸這身份，亦有向身邊朋友取經湊B：「佢唔係咁跟姐姐，都會黐我哋多啲，照顧上用嘅時間、心力就攰啲，夜晚嗰Part就全權我哋負責。」可有試過換片同餵奶？他搞笑大呻曾被人趕走冇份換片：「因為我唔叻，餵奶就我負責，沖涼都有幫手嘅，總之娛樂嘅嘢就我負責，我係娛樂部！」日前他在日本工作不適入院，他指因工作繁忙搞到身體「出事」：「有各種唔舒服，呢排真係飛得好密，好痛苦，我鍾意做嘢，但身體唔好都幾麻煩。」
睇綵排幕幕驚心又精彩
《狂電派》特技匯演將於12月14日正式公演，身為代言人的樂仔表示屆時會現身打氣，演出就交給專業人員。問到以往拍戲的危險鏡頭是否親身上陣？他說能夠應付到都會做，但不會勉強：「唔想阻到人哋嘅進度，始終佢哋係專業嘛。（乘機偷師？）呢啲唔係睇兩眼就識，但有同演出嘅車手傾偈，知道佢哋喺飛車方面係世界紀錄保持者，可以想像到個騷幾咁吸引！（睇到驚心動魄？）其實我都答唔到，我只係睇咗綵排，未睇晒全部，我只可以話每一幕都唔能夠錯過，幕幕精彩。」
最深刻越野車點對點飛馳
70部超級電能車中，問到最想駕駛邊一部？他說：「太多喇，好難揀，但有架都好深刻，係一架四輪越野車，由一位健力士世界紀錄保持者揸，點到點飛來飛去，好震撼，唔可以用言語去形容，真係要入場親自感受嗰種感官刺激。」至於導演Abigail就表示好榮幸可以於澳門出演全球首個室內電能車騷，動用超過150名來自全球頂級製作、特技界精英，於演出期間四處飛馳狂飆，震撼全場！