「蝦碌爹哋」盛品儒報漏數蔡一鳳誕龍鳳胎
恭喜恭喜！好事成雙！名媛蔡一鳳前日在醫院開刀誕下龍鳳胎，湊成「好」字，新手爸爸盛品儒疑開心過龍，向外只提了B仔資料，惹來千個問號，事後他解釋：「仔真係得一個喎！」不失幽默作風。他們又表示已請了陪月及五個工人侍候一對寶貝，認真大陣仗。
蔡一鳳（Michelle）和盛品儒的愛情結晶品終於出世！前日早上大肚的Michelle見血，立即前往醫院，陣痛了四、五小時後，決定剖腹，順利誕下孖B。囡囡較早出世，重4磅11安士，兒子則較重磅達6磅13安士。曾表示擔心見血會暈的盛品儒，竟鼓起勇氣入產房剪臍帶。榮升新手爸爸的他昨日回覆：「好神奇、好開心，但亦好有壓力，因為養小朋友要好多錢！（見BB出世好緊張？）還好，Michelle就好緊張！其實身邊好多朋友都結晒婚生咗細路，但自己生嘅始終感覺好唔一樣，依家人生新一頁開始，希望努力做嘢，仔女快高長大！（你唔怕見血？）少少怕，不過都要剪。」
解畫顯幽默本色
問到孖B似邊個，他說：「太細個，依家未睇得出。（點解你同其他人只講B仔資料？）仔真係得一個喎！」令人哭笑不得。其實自Michelle懷孕以來，夫婦對胎兒的資料十分口密，希望直至BB出世才揭盅，製造驚喜，估計盛品儒初為人父緊張又開心，只掛住講B仔，才未提及囡囡，認真搞笑。
半打人手侍候孖B
Michelle則透露已為女兒改名，兒子則尚未決定，她說：「B女叫盛樂芙，英文名Lov，取其中文名諧音，又似Love，有愛的意思；B仔個名仲未揀定，因為我有咗BB之後好鍾意食包，好似菠蘿包、叉燒包等，所以B仔乳名叫『包包』。」對於一次過湊兩個B，她未有太擔心，因為已請了五名工人姐姐及一位陪月幫手，有半打人侍候，如此強大後盾，難怪笑言：「應該沒問題！」她表示希望以母乳餵哺，想給最好的BB，故會盡力嘗試，但現時未夠奶水。對於老公克服怕血入產房剪臍帶，她亦笑說：「佢剪完，仲好開心咁同我分享炫耀。」