上月古堡行禮苟芸慧搶閘做人妻！
藝人苟芸慧與賽車手陸漢洋將於本周五在上水雙魚河鄉村會所擺喜酒，昨日爆出原來他們上月已秘密註冊兼在古堡行禮。陸漢洋為製造驚喜，連新娘子也騙過，以為去古堡只影婚照。
昨日驚爆苟芸慧（苟姑娘）與陸漢洋（William）經已註冊行禮，據知兩人上月18日在多倫多行禮前，於另一個神秘地方註冊。其實兩人自宣布結婚後，分別到加拿大、法國及韓國等地影婚照，加拿大是苟姑娘的成長地，她一直希望帶William返家鄉多倫多，與未能來港出席婚宴的長輩見面，並順道拍婚照。
以為影婚照
陸漢洋得悉苟姑娘心意，便偷偷安排一個古堡婚禮，鎖定多倫多唯一一個古堡行禮，並私下聯絡苟姑娘的爸爸、胞弟和在加拿大認識超過二十年的舊同學及契姐Winnie，夾份炮製驚喜。苟姑娘說：「呢個係一個好溫馨嘅婚禮，其實我之前已經覺得佢古靈精怪，不過佢一向都係咁，所以冇理。婚禮舉行嗰朝，原來佢將婚紗帶到多倫多，我仲以為只係去影結婚相，心諗呢個應該係佢畀我嘅驚喜，之後去到婚禮現場，先知原來真係一個婚禮。當見到一啲接近十年冇見嘅長輩、朋友專誠嚟出席，真係好開心，睇得出William花咗好多心機去籌備。」
喊住讀誓詞
婚禮有不少感動位，宣讀誓詞時，苟姑娘一度感動落淚，及後與爸爸共舞時又熱淚盈眶。而William除即席獻唱外，更專登學跳社交舞，苟姑娘形容是不可能的任務：「雖然佢跳起舞嚟好似機械人，但佢為我放低咗平時愛型嘅性格，好難唔感受到佢嘅誠意。」婚禮又撞正颱風「山竹」襲港，幸而未有影響來賓的航班，William笑言：「好感激上天嘅安排，見到朋友出席，我哋都好開心。」名副其實「打風都打唔甩」！