張珮汶佗B5個月掃巨型花膠
亞姐冠軍張珮汶（前名張家瑩，Grace）今年4月嫁人，準備度蜜月前驗出懷有身孕，Honeymoon雖然去不成，佗Ｂ5個月的她仍打算與老公去Babymoon。日前這位活躍「大肚婆」，在媽媽陪伴下買4萬元的名貴花膠補身。
Grace貴為2007亞姐冠軍，今年4月和圈外男友何駿杰在港低調擺婚宴後，早計劃不設防生一仔一女，然後相夫教子做幸福少奶奶。
害喜嚴重要臥床
這個心願火速達成，當夫婦倆準備啟程去蜜月前，Grace驗出有孕，當時害喜情況嚴重，不時嘔吐又易疲倦，要臥床休息，至今有孕5個月，經醫生檢驗後指胎兒穩定，她即刻出動Shopping！
日前Grace在媽媽陪伴下現身九龍城海味店，明顯見肚的她與媽咪在店員推介下，拿着塊巨型花膠研究，店員指該塊花膠價值4萬多元，膠質勁多，最適合孕婦坐月時煲湯飲用，更可以減掉肚紋。張母愛女心切，當然不手軟，重錘買下花膠給Grace補身。
性別保持神秘
之後兩母女轉睇BB用品，除了睇BB床、BB車，只見她揀選的嬰兒衫以藍色及黃色為主，看來腹中塊肉為男B！
事後Grace接受電話訪問，承認已佗B5個月的她說：「好想同人分享呢件開心事，但又驚唔穩，依家都5個月，害喜情況亦冇咁嚴重，之前又嘔又腰痛，成日要瞓喺床，依家好好多啦，可以出得街。（仔定女？）我想保持神秘，醫生都叫我做多啲運動，健康最重要！媽咪緊張我，所以嗰日帶我買花膠補身。（順產？）係呀！醫生話我高大，盆骨夠大，應該夠生，老公都唔想我開刀，無啦啦多個傷口。」
Grace又指老公好疼錫她：「我係坐唔定嘅人，之前諗住Honeymoon去歐洲玩，點知起程前有咗，日日瞓喺屋企好悶，早排老公出去應酬，我情緒好忟憎，有發佢脾氣，好彩佢明白大肚婆情緒問題，好體諒，遲啲佢會陪我去旅行，冇得Honeymoon咪Babymoon囉，揀個近啲地方，醫生都話得！」