陳家樂受寵若驚願望長撈長有

老闆送上兩大蛋糕，家樂笑到見牙唔見眼。

近日忙於拍攝以ICAC為題材的新劇及英皇新戲《神探大戰》的家樂，昨日於工作中度過生日。不過，前晚「收早」的他獲一班好同事準備驚喜飯敍，提前慶祝，他開心說：「咁啱林夏薇喺台灣返咗嚟，佢送咗支酒畀我做禮物，而詩雅就幫我準備咗生日蛋糕，好感動！佢哋算係我圈中最好嘅朋友，同佢哋一齊過生日真係好窩心。（生日願望？）今年我好好彩，遇到《逆緣》爺爺嘅角色，希望日後大家繼續認同『陳家樂』，當然想長做長有，生日有得開工，成個人都分外安心。」

等收工請食好西

經理人公司老闆楊受成昨日特別到片場探班，劇組包括男主角劉青雲與湯怡等，還送上兩個生日蛋糕為家樂慶祝，楊受成對壽星仔讚不絕口：「我一直睇好家樂，佢不單外形好，工作又認真。呢一年佢事業有突破，我好替佢開心，希望佢能夠好好把握機會。」直言受寵若驚的家樂表示很開心：「第一年同老闆慶祝生日，佢仲話要請我食飯，睇我幾時收工。（想老闆帶你去食乜？）佢帶得我去食嘅，一定好味啦！」人緣不錯的他獲《神》片拍檔劉青雲，及因準備今日Twins澳門騷而缺席昨日拍攝的蔡卓妍（阿Sa）送上生日祝福，相當有愛。

家樂與湯怡喜獲老闆楊受成探班，受寵若驚。	家樂雖工作中過生日，但獲一班巨星拍檔陪吹蠟燭，抵番晒喇！	林夏薇及衛詩雅率先賀壽，衛詩雅更「撩」蛋糕整蠱家樂！

樓市波動 上車Hold住

談到有意購入千萬靚樓，家樂回應時謙稱：「我邊有賺得咁多？大家太抬舉我！想買樓係因為依家屋企唔夠地方用，年底妹妹註冊結婚又暫時冇諗住搬走，所以先有咁嘅想法，但近日樓市好波動，我同家人商量過可能裝修先，儲多啲錢先再作打算。」