馬德鐘父子檔Chok住燒槍

馬在驤玩實彈射擊，有型有款。

修五科日操夜操

現年20歲的馬在驤今年到澳洲讀大學，主修機械工程學系，他越洋受訪分享學校生活：「今個學期修咗五個學科，讀精算統計、多元微積分及模型、機械建築、工程力學及物料，經常同同學合作做團隊報告，學期尾就有考試。」過往游水獲獎無數的他，現時是大學泳隊隊員，除課餘實驗，便是練水、練體能，日操夜操，練到手瓜起𦟌︰「除咗星期日休息，一星期有七堂練水，每堂兩個鐘，同三堂體能訓練，時間編排好緊迫，但好有滿足感，同大學泳隊教練及隊員合拍又投契。」

想同「在哥」齊煲劇

今年他更獲大學體育獎學金，常代表大學出賽，早前便隨泳隊到布里斯班參加大學生游泳錦標賽。馬德鐘探望兒子期間，父子還獲當地槍會邀請試玩實彈射擊，馬在驤揸起槍甚有台型，問他有否煲《跳》劇捧爸爸場？他笑說：「知道部劇喺無綫同優酷同播，但香港同澳洲有三個鐘時差，加上要練水，課程編排又緊密，暫時都未睇，我好想睇，覺得套劇好有正能量，希望之後有假期返港，『在哥』同『小在哥』可以一齊煲劇，先祝《跳》劇收視報捷。」

馬德鐘與兒子馬在驤十足兩兄弟！

在澳洲讀大學的馬在驤，日夜操練，手瓜起𦟌。