高鈞賢北上掘金錫身 女友口講安心又要監場

高鈞賢（Matthew）高大靚仔，早年轉攻內地市場掘金，早前忙裏偷閒回港與朋友相聚，並出席天梭表活動。談到在內地發展事業，他直言內地娛樂圈誘惑很大，笑說：「可以有嘅係會有嘅，但係我都入咗行咁多年，去到內地都係想專注番事業，另一半都會上嚟監場。」又指女友有逆向思維：「我喺香港嘅時候，佢反而擔心啲，因為香港比較細，好多活動都好多女仔，有啲新聞標題佢會覺得好真。喺內地拍劇好少有花邊新聞，佢會覺得安心啲，可能佢唔係咁清楚啦，哈哈！自己都會畀安全感佢，我同佢一齊都係事業低潮嘅時候，佢一直陪我成長，我好感激。」他希望下一步是結婚，但屆時不會大事宣揚，不想有「做騷」的壓力。

驚受傷被易角

自小是運動健將的Matthew，曾因打籃球而兩次受傷，當時嚴重到要停工，令他明白到錫身的重要性，尤其內地市場變化大，若演員需休息養傷，就很大機會被易角，他說：「內地拍劇都試過手受傷，未至於甩骹，但冇力，好彩一個禮拜後就好番。又試過落地一跣拗柴，你始終係演員，令到成個劇組延誤，佢哋都會換人。」

女友共度患難，高鈞賢希望早日拉埋天窗。	劇組中有女拍檔，又難怪Matthew的女友要北上監場。	高鈞賢與葉童合演抗戰劇，獲益良多。

他又分享早前跟前輩葉童合作的經歷：「係抗戰劇，得我同佢兩個香港演員，因為好多爆破同槍戰場面，我哋都以安全為主，好多時候要保護自己。」

斷絕聯絡向外闖

Matthew自言決定北上發展前，已更改電話號碼，全為令自己下定決心離開香港，驀然回首，他認為一切都值得：「以前都算係一張白紙咁踏入呢個行業，唔清楚應該點樣行，人哋叫你做咩就做咩，冇空間變成熟，我冇代表作就上去發展，都好艱辛，要見導演試鏡，好多謝佢哋畀機會我。」