高海寧減肥赴台派福利
無綫花旦高海寧昨日以露肩裝兼晒長腿出席活動，她表示本月底會飛到台灣拍攝新劇《殺手》三星期，因屆時並非日日開工，所以約定同劇的李佳芯攝時間自由行，並預告會在網上發布大量自拍照向網民派福利。她說：「啲人叫我減定肥先，因為去到有好多嘢食。我有朋友移民咗去台灣，佢哋生活都好輕鬆。（打算移民？）儲吓錢先，我依家供緊樓。台灣好近日本，到時可能飛埋去Shopping先返嚟。」
另外，對於好友岑杏賢日前30歲生日，高海寧指當日大家在酒店搞派對十分開心，問到會否介紹男士給單身的壽星女，她說：「當日有人帶男仔嚟，不過係朋友。佢係好女仔，又有學識，唔使人介紹，佢會睇定先至開始，享受吓單身先，女仔要學識愛自己，先搵到愛自己嘅人。」