藝人鄧麗欣（Stephy）昨日出席慈善活動，見她一臉倦容，她坦言剛去了歐洲半個月。有男友邱勝翊（王子）同行照顧，問到是否幾攰都開心？她說：「我真係去做嘢o架，係最尾一站巴黎先見到佢。今次仲被人偷電話，雖然冇影響心情，但幾驚險，因為第一次見住個賊同自己講嘢，講完枱上面嘅電話就唔見咗。（與王子失聯？）咪問助手借電話囉！」有指帶挈王子升呢到巴黎以情侶檔出席國際品牌活動，Stephy說：「邊係我帶佢去？唔係啦！一齊出席嗰次係去到當地先被邀請，唔係好正式活動嚟。」
本月15日35歲生日的她，坦言會在台灣過，因其飲品店於14日在當地開張。問到兩人是否在當地同居？她說：「冇呀！（你去台灣住男友家唔使亂使錢？）你知我慳家嘅！（住埋一齊咪同居囉！）我唔係嗰種，係收留啫！（王子嚟香港你又收留佢？）係呀，幾日唔係叫收留叫咩！」至於暫與Stephy分隔兩地的王子，已急不及待在她的飲品店打躉，在社交網上載率先試飲的相片，幫女友宣傳，難怪網民留言讚Sweet到爆！