周勵淇奸上癮郭晉安：佢仲假過我
視帝郭晉安與周勵淇昨日出席劇集宣傳活動，於劇中經常「笑騎騎放毒蛇」的郭晉安，大讚女方演得出色：「佢仲假過我！」而周勵淇表示「奸上癮」，希望有機會做「女版郭晉安」。
郭晉安、林文龍、周勵淇（Niki）、袁偉豪、鄧佩儀及楊埕等昨日到馬鞍山，宣傳無綫劇《再創世紀》。眾星大玩拗手瓜遊戲，林師傑先後跟袁偉豪與鄧佩儀拗手瓜，作狀飛落台笑爆全場，至於身穿熱褲的尹詩沛不慎露底兼露毛。
老婆整怪味蛋糕
本月9日生日的安仔，獲大會送上蛋糕預祝牛一。他表示試過生日全日開工，忘記了慶祝。記者笑指家人必定會幫他記住，他說：「兩個小朋友會記得，都係畫卡，期望有一日佢哋大個，我枱頭會見到部電話。（太太呢？）都會有啲心思嘢，整個蛋糕。（佢注重健康，整健康蛋糕？）係，冇糖，怪怪地，都會食晒嘅。」
談到劇情發展，Niki將與安仔正面交鋒「鬥奸」，安仔說：「佢過咗成長階段會挑戰我，仲假過我！男人最怕女仔啲乜嘢？我就係死喺佢眼淚度。（唔係美色咩？）哈哈！佢有嘅，但礙於電視尺度。」Niki表示很享受演奸角 ，希望下一次可做「女版郭晉安」笑住奸。
袁偉豪流年不利
同場的袁偉豪早前身體不適入院，他表示已康復不少，但見他一臉倦容，左眼更爆微絲血管，他說：「係嘔到爆咗，因為衝力好大，之前拍《鐵探》又夾爆手指，但都好小事，幾辛苦都克服到。（係咪流年不利？）今年健康的確有啲反覆，可能係拚搏忽略咗身體。」又透露將放假，可跟家人及女友張寶兒去東京旅行：「會盡量安排自由時間，我都去過東京，會做埋司機。（如果媽咪同女友想去嘅地方有分歧呢？）佢哋自己搞掂，我搵地方坐低等，大家各自去夾時間再會合。」