梁靖琪被生葬驚窒息死
藝人梁靖琪（Toby）與父親梁家樹父女檔拍攝新劇，不過「落場無父女」，Toby不但沒有任何優待，還要拍攝被沙泥活埋的戲份，被活埋一刻，大有接近死亡的感覺，有苦自己知！
Toby主演的網劇《蝕日風暴》正於「黃Viu煲劇平台」播映，雖然該劇由其父梁家樹監製，但她拍攝時並未有任何厚待，反而吃了不少苦頭，其中一幕更要親自上陣遭「生葬」，可謂觸目驚心！
好多蟲鑽來鑽去
談到這場活埋戲，Toby坦言記憶猶新，指當時環境非常惡劣，加上天氣不好，令她更加緊張：「我記得當日天氣好差，泥又濕，真係好驚！因為心理上感到有好多蟲喺泥裏面鑽來鑽去，拍咗兩日，要重複跌落一個窿後再被活埋，拍攝後我連底褲都濕晒。」談到被沙泥埋住那刻，Toby直言感覺就像經歷生死一樣︰「原來被活埋真係好驚，因為我連頭都要埋喺泥堆當中，嗰刻睇唔到嘢，又好難抖氣！真係好恐怖！」
洗三次頭仲有沙
完成拍攝後，Toby因滿臉泥濘不能抹眼，要由幾位工作人員協助從泥中拖她上來，才能進行清潔，Toby笑說︰「拍完起身嗰時，要幾個工作人員拖我上嚟，因為唔可以即時抹眼，要先用水清洗。拍完返去沖身，洗咗三次頭仍然有沙，耳仔即使每日清潔，都足足一星期仍然有沙喺裏面。」
