歌手「天使」近年走親民路線，每次接受傳媒訪問都唔介意主動講自己嘅仔女，仲講到眉飛色舞添。記得早幾年臨近樂壇頒獎典禮時，佢差唔多日日都見報，次次都有提個仔，成件事不知幾溫馨。
不過有一晚「天使」現身一個音樂會，有電視台嘅新人主播把握機會採訪佢，講完一輪音樂嘢後，嗰位主播順口問：「你個仔有冇音樂天分o架？」點知呢個時候佢突然靜咗唔出聲，仲示意停機唔好拍，而佢個助手即刻衝出嚟黑面話：「佢唔想再講太多家庭嘅嘢，你唔好再問啦！」吓？佢前一日出席活動時主動提過個仔喎！點解相隔24小時就完全唔同晒？究竟「天使」係雙面人睇唔起新人，定係助手心急護錯航呀？
