SG驚遲婚冇得生約埋雪卵
閨蜜般要好的Super Girls（SG）坦言試過親密到肉帛相見浸溫泉，並影相留念，更想過一起雪卵！講到友情與愛情的重要性，戀愛大過天的Cheronna和Jessica口快快稱男友比較重要，隨後才補鑊指兩者同樣不可缺少。
SG相隔一年多推出跳舞快歌《閨蜜專用》，為了有更佳狀態，日前五女齊齊健身，務求操弗靚Body。她們表示新歌紀錄組合成軍7年，當中有開心及不開心的回憶，例如試過出埠工作，連續三日冇覺好瞓很痛苦。
Cheronna拍拖最重要
親如家人的她們，試過肉帛相見浸溫泉，Aka更踢爆Yanny拍下不少「艷照」，Yanny即笑說：「我哋房間有私人風呂，覺得人一世物一世，不如影吓。」問到是否全裸相？Cheronna說：「影個樣咋！」「受害者」Jessica扮嬲說：「Yanny喺前面自拍緊，但我唔知，我坐喺遙遠嘅後面享受緊個風呂，佢影完係咁笑。」問到有否刪除相片？Yanny說：「Jessica好緊張Delete咗。」
問到之後還有甚麼事想一齊挑戰？Jessica坦言：「我哋最近講緊最閨蜜嘅嘢，就係研究雪卵，因為我哋驚年紀大生唔到BB，而且太忙冇時間生。」問到將來可想約埋一齊結婚或做媽咪？Yanny抵死說：「唔通真係等Aka 50幾歲先結婚生仔咩？佢成日睇相話50幾歲先結婚。」
問到閨蜜與男友誰較重要？熱戀中的Cheronna秒答：「梗係男友啦！」Jessica亦認同：「一個好嘅男朋友都係你個閨蜜。」隨後她補鑊：「但有好多嘢可能未必同到家人或男友傾，而閨蜜呢個時候就可以企出嚟關心我。」
Aka遭姊妹狂寸
至於單身的Aka表示覺得閨蜜很重要，但被Cheronna寸：「如果你有男朋友，一定會陪男朋友多啲，因為你太多年冇拍拖。」Jessica亦踩多腳：「咁你拍拖會唔會唔理其他人？」令Aka語塞，場面搞笑。
場地：Air Fitness（黃埔分店）