陳柏宇老婆產後大控訴狂數「粉蛋」！
歌手陳柏宇日前榮升爹哋，「愛女狂」上身的他日日霸住小公主，更與岳母爭抱B！不過，他為了賺奶粉錢去中山開騷，昨日未有接太太符曉薇出院，即遭狂數「惡行」，更被稱為「粉蛋」！
符曉薇（Leanne）本月25日剖腹誕下囡囡Abigail，留院4天後，昨日抱女回家坐月，老公陳柏宇因為在中山舉行巡唱，故安排朋友代接妻女出院。新任媽媽Leanne雖然素顏示人，但精神奕奕，戴Cap帽和黑超，愛女在其懷中熟睡，任影唔嬲。
呻湊B餵奶有撕裂感
她指小公主提早了20多天出世，加上收水，是全院最細粒的BB，而且皮膚泛黃，幸而照燈後已退黃。她坦言湊女很辛苦，有撕裂的感覺：「瞓兩、三個鐘就畀人拍醒餵奶。（囡囡乖唔乖？）好乖，但真係唔讚得，讚佢第二日即刻扭計，一放上床就喊，可能老公抱慣咗。」問Abigail是否已改中文名？她表示會先請教師傅意見。
踢爆產房扮醫生
提到老公在內地開騷賺奶粉錢，Leanne實行爆大鑊，狂數其「惡行」：「佢喺醫院霸住個女抱，（我）媽媽想抱孫都死唔放手，話佢抱住都睇得到！佢今日出門口幾個鐘就打Video call，傾幾句就問個女喺邊，我話『你其實唔係搵我o架？』以前佢會同我爭寵貓貓狗狗，依家話抱住個女就得！」她又在社交網發千字文分享生產過程，笑稱老公是「粉蛋」，除了忘記帶「走佬袋」外，又在產房扮醫生，令她又嬲又爆笑！
至於柏宇在中山開騷前受訪，問到是否很想念妻女？他即傳來斷腸聲：「梗係掛住啦，都不知幾掛……」又指雖然無暇接妻女出院，但不至於有遺憾：「Leanne會影相畀我睇，知佢哋安全返到屋企就OK。」
