吳浩康爆洪卓立拍拖報喜不報憂
走「偶像實力派」路線的洪卓立和吳浩康，等足11年終在10月11日合體開騷。二人唱功了得，不同之處是洪卓立有一位拍拖11年的女友，相反吳浩康多年來在情場上屢戰屢敗，「單身狗」的他渴望成家立室，可惜每次都是有緣無分，至於洪卓立有條件卻不想結婚。
洪卓立（Ken）與吳浩康（Deep）雖然分屬同門，但音樂上未試過正式合作。二人終獲公司欽點，10月11日一齊Crossover開騷。Deep表示：「我真心覺得Ken係好歌手，佢係衰靚仔，好多人標籤靚仔就係偶像派，雖然我都暗地裏覺得自己靚仔。」Ken聞言即說：「我係肥嘅靚仔囉！」
分手影響情緒
Deep坦言不擔心賣飛壓力：「有信心令觀眾覺得物有所值，而且我對Ken嘅叫座力好有信心。」Ken則笑言與Deep互相仰慕很久，但過去11年來印象中只合作過拍戲，今次難得同台，已想好自己哪首歌最適合對方唱。
去年Deep開騷時有女友撐場，現時單身的他被問會否影響情緒？他坦言：「你問我靜落嚟會唔會諗起？會嘅，會唔會酸？會唔會痛？會嘅。但係有啲關係去到咁上下，會有另外一啲出路。（你話過視佢為結婚對象。）我係咁諗，但唔代表人哋咁諗。」問到可會羨慕Ken和女友湯怡的馬拉松式戀愛？他笑言：「梗係唔羨慕啦，拍咗咁耐，哈哈哈。你見到佢美滿幸福，其實佢會唔會有唔開心同Lonely嘅時候呢？總會有啲範疇同唔到枕邊人講，又同唔到朋友講。」Ken十分認同對方所言，他說：「其實我同女友選擇一啲好開心嘅嘢畀大家睇。」
冇結婚壓力
問到可有結婚計劃？Ken稱拍拖初期有諗過，但自從年前他大病一場後，便打消念頭：「我哋都一齊住，結唔結婚冇分別。」他又稱哥哥已婚，父母有孫抱，故沒有結婚壓力。提到湯怡成功置業，問到可有幫忙？他笑言：「嗰啲唔答你，佢嘅就係佢嘅，幫到就幫啦。」
吳浩康
髮型：Moe@Fifth Ng
化妝：KeiKei Ng
服裝：Carbali
洪卓立
髮型：Terry Yeung@Corner
化妝：木子維納
服裝：WTDAF