衛詩雅推開陳家樂：「辣霸」先啱我

詩雅稱與家樂完全唔過電，似屋企人多啲。

陳家樂與衛詩雅屬同一經理人公司，加上成長背景相若故私交甚篤，就連飲食習慣都非常相似，最愛流連快餐店。而近日他們合作為「大家樂」推出的慈善活動任大使，絕對「合晒合尺」﹗談到光顧快餐店的經歷，家樂自爆瘀事：「好記得小學食一人一鍋，食到一枱都係，快餐店嘅清潔姐姐見到就走嚟同我講：『小朋友，咁樣食嘢會畀人話冇家教o架。』當時我即刻爆喊，但後來明白佢係為我好。」

快餐店打躉抄功課

兩人又自爆求學時，最愛在快餐店打躉、溫書及抄功課。詩雅自言其「三心兩意」的性格難滿足，她說：「約我食飯嘅話，就知我成日轉諗頭，可能出街前想食中菜，落到樓下又想鋸扒，讀書時冇乜錢，去快餐店就可以滿足晒我所有要求。（試過展開美味情緣？）我好鍾意食辣，一定唔會搵個唔食辣嘅男友，點溝通？『辣霸』比較啱我。（唔考慮吓家樂？）同佢似屋企人，點會同屋企人拍拖？況且依家唔諗感情住。」

「飯桶」拍拖要貼地

而家樂雖未覓得「真命天女」，但感恩以往的女友都肯與他去快餐店：「我有自知之明唔會『越級』，拍得拖都係相同圈子嘅異性，而拍拖節目通常都好平民，只會過時過節先去啲貴少少嘅餐廳。」外表溫文的他是「飯桶」一名，更笑說：「我哋一家出街食飯其實好麻煩，事關我爸爸對飲食好有要求，佢一定要食中餐，每朝起身要歎茶，完全唔掂煎炸嘢。佢唔肯同我哋去旅行嘅原因，就係出埠可能搵唔到中菜食！」

兩人在公在私都非常合拍，不時相約出海。	家樂與詩雅不時拍戲演情侶。	同為單身的兩人笑容一致，相當合襯。