楊怡舞劍亂篤險殺秦煌

一眾新劇《再創世紀》演員昨日到社區中心宣傳，與一班長者玩遊戲。該劇在內地已率先播畢，最終安仔會腦中風，結局悲慘，他說：「戲入面好慘，但現實結局就好好，不過上次差啲畀阿怡扑傻，佢攞起以為係道具嘅木棍想扑我，但其實係真木，最後佢扑咗自己個頭一下。」對於阿怡的烏龍事，安仔稱「睇少眼都唔得」，還形容她：「佢攞住任何一樣嘢，唔理係乜嘢，就算係條蕉都好，大家都唔好企喺佢度。」

對收視有信心

在旁的楊怡不停狂笑，又自爆：「我好易有錯手嘅時候，我攞住啲嘢就會舞嚟舞去，差啲殺死秦煌！」她稱當年拍《布衣神相》，她等埋位沒事做，便拿劍對着布景後的麻包袋亂插：「阿煌好大個肚腩，着件衫係麻布質地，人就攝咗布景板後面，個肚就凸咗喺布景板出面，咁有好多麻包袋喺度，我就攞劍亂拮，拮拮吓咁脹嘅，我冇拮落去，死囉！原來阿煌喺度瞓緊覺。」問秦煌知否險些魂斷她劍下？她笑說：「我有講佢聽，佢笑笑口走咗。」

提到劇集已知結局，問他們可擔心影響香港的收視？阿怡稱內地版剪輯過，反而香港版足本播放；安仔亦稱不擔心，喜歡該劇的人必定繼續看。對於有網民指劇中的證券交易與現實有出入？阿怡自言不太熟悉股票，加上故事背景是很多年前，可能會有些分別。

林文龍與長者玩遊戲。	湯洛雯派心心冧粉絲。	完成活動後，楊怡駕駛百萬新車離開，之後將座駕駛往車行維修，期間見到記者一臉驚訝。

百萬新車入廠

楊怡完成活動後，便駕駛買了差不多半年、約值一百萬的新車離開，期間先接送助手，再返大埔寓所。1小時後，她再駕車外出，見記者追訪亦大方表示座駕需要維修保養，之後將車駛到葵涌某車行，逗留約半小時，由車行人員接載返寓所。