歌手陳柏宇昨日到電台宣傳新歌《認真如初》，提到剛上載冇着褲的惡搞短片，他笑說：「呢啲係我先諗到，我啲同事慣咗睇我唔着褲周圍走，我成日喺佢哋面前換衫，唔想浪費時間走入房。（女同事有冇投訴？）冇呀，福利嚟o架！」
對於快將成為人父，他坦言不緊張，已準備剪臍帶，又指太太符曉薇的預產期在10月初，已大致買齊嬰兒用品，只欠沖涼盆，笑言或改用洗碗盆。問太太可有緊張？他指對方較緊張產後收身，又說：「到時我會帶個女出嚟，歡迎你哋湊，自問有經驗、唔驚跌佢落地就隨便。」
