「戰狼女」盧靖姍認定韓庚恨嫁…急唔嚟
憑《戰狼II》名利雙收的盧靖姍，多次感激伯樂吳京的賞識，令她有機會在內地發展，完成亡母心願。Celina感情生活同樣令人羨慕，與大陸型男韓庚相戀，不時被拍到出雙入對甜到冧，揚言想盡快組織家庭生小朋友。
中美混血兒盧靖姍（Celina Jade）於15歲簽約日本音樂教父小室哲哉旗下出道，之後卻為學業暫停演藝之路，入讀倫敦政治經濟學院，並以一級榮譽生畢業，再轉戰美國市場，可惜發展成績一般。直至吳京邀請擔任《戰狼II》女主角及票房報捷，她一躍成為56億票房女王，名利雙收！
人紅多工作：試過36個鐘冇瞓
現居住北京的Celina主力內地發展，不會局限發展方向：「依家接咗兩套電影，當然香港或者美國有好劇本都想拍。（都係打戲？）唔係！嚟緊有套係喜劇，咩都想試。」唱歌出身的她究竟會否想演戲還是音樂？她說：「我一生人都冇一個好清晰嘅路線，不停喺度兜兜轉轉，依家參加咗內地歌唱綜藝節目《跨界歌王》，我都好耐冇唱歌，係新嘅挑戰。」工作接踵而來，曾令她吃不消：「做呢行日捱夜捱好辛苦，時間顛倒，好多時都唔夠瞓，最誇張試過36小時冇瞓！（連續拍戲？）唔係，係由拍戲、參加節目跟住做訪問，仲要係拍動作電影，好辛苦！成個人好暈，個腦轉得好慢，記台詞又記得唔好，但依家好啲，雖然都係排到好滿，好彩公司都安排有足夠休息時間。」
眾所周知，Celina已被內地型男韓庚「私有化」，今年2月齊齊於微博上公開戀情，更不時出雙入對Sweet到爆，但被問起男友即顯得避忌。現已32歲的她會否想快點組織家庭？她說：「我想但唔急得！有諗過嘅，但唔好諗得太多，順其自然喇！我都想有自己小朋友，但都唔知生唔生得，如果生唔到，領養都幾好。（同男友感情穩定，大家係咪有共識？）搵到啱嘅人都會視佢為結婚對象，但唔好有壓力，自然咁去，我唔急。」
Celina早前來港，專程為名媛好友陳高蓮舉行的慈善義賣活動擔任嘉賓，義賣收入部分撥捐香港癌症基金，自言因媽咪癌症過身，令她更關注此病：「癌症對我嚟講唔陌生，我希望可以利用演員身份令大家關注。」母親於2015年患上胰臟癌與結直腸癌，與病魔抗爭兩年後離開，Celina說：「我學到呢個世界冇理所當然嘅嘢！以前可能好有野心，想成功、想賺多啲錢，但經歷媽咪離開後，發現每一個目標都有所犧牲，如果犧牲嘅係健康，就真係唔值得。」當知道媽咪患病後，她即時放下所有工作：「胰臟癌係好惡嘅癌症，當時醫生話做手術可能得六個月命，唔做得三個月，所以放低晒所有嘢，因為已唔再重要，賺錢遲啲都可以，唔想有後悔，幸運地媽咪奇迹多活兩年。」
獲母支持拍《戰》：遺憾睇唔到今日嘅我
媽咪患病期間，曾鼓勵Celina一定要拍《戰狼II》，她說：「當時我接到吳京電話，只問咗佢兩條問題：『如果有時間，我可唔可以返香港陪媽咪？』佢話冇問題，我再問佢使唔使除衫，佢都話唔使，所以答應佢拍。我好感激吳京，如果唔係因為佢，根本冇今日嘅我！以前冇諗住做演員，十年前同吳京合作拍《狼牙》之後先開始諗，當時講過：『如果有日佢搵我拍電影，無論如何都會答應佢。』當時我第一時間問媽咪，佢一直希望我返內地發展，但我當時唔識人，直到遇到吳京，媽咪好開心，仲話呢個消息令佢有戰勝病魔嘅推動力。雖然最後佢都睇唔到首映就走咗，但知佢個心好支持我，只係遺憾睇唔到今日嘅我。」
髮型：Jackson by Pacific Place II Colpo
服裝：Max & Co.
場地：香港君悅酒店