張智霖爆靚靚屙嘔生日飯落空
藝人張智霖（Chilam）與范振鋒及前藝人王嘉慧前晚出席桌球活動，同場還有世界級桌球名將韋德（Jimmy White）。提到本月4日是袁詠儀（靚靚）生日，Chilam早有準備，透露已想好送甚麼禮物：「識咗咁多年，要送都送得咁上下，會送啲比起禮物更有意義嘅嘢，但唔講得住。」而他８月底生日，問到靚靚送了甚麼禮物？他說：「佢冇送，嗰日食飯，佢唔知係咪食物中毒又屙又嘔，佢即時返咗屋企，第一次冇陪我食生日飯，不過佢隔晚就好番。」
講到打桌球，他自認技術不俗：「細個成日打，打到廢寢忘餐。（囝囝有冇玩過桌球﹖）有，但佢未夠高，不過都打得有板有眼。」問到會否落場獻技？他笑言無謂獻醜，因為並非本行，會感到緊張，還是做觀眾較合適。
范振鋒逃學打桌球
至於范振鋒從小沉迷打桌球：「當年逃學去打桌球，媽咪上去波樓搵我，我癲到一個人練波，因為知道職業選手都係一個人練，都有參加吓啲比賽。有時為咗見啲球星，我會義務去做桌球比賽嘅工作人員。」提到日前太太李思欣指怕被責難，所以背着他性感拍廣告，他坦言：「好多人都問我點解咁小器，我其實冇話唔畀佢着乜，可能以前話過吓佢，覺得無謂畀人睇，自己阿媽都唔好啦，何況係太太。」