孖人夫共浴黃翠如浸到病
藝人黃翠如昨午到將軍澳，以品牌代言人身份出席港姐頒獎禮，與出爐港姐陳曉華、鄧卓殷及丁子田同場。翠如明顯再瘦一個碼，她解釋：「可能之前同森美拍出浴戲，浸喺水好耐，完咗之後就感冒嘞！」她又大讚森美身形弗：「佢話自己冇操，但都好好。（佢好啲定男友蕭正楠好啲？）唔同，阿蕭係可愛型。（同森美出浴尷尬？）完全冇，因為浴缸唔夠兩個人用，我哋要諗辦法，拍完又要轉缸再拍。」
談到早前在《美女廚房》煲粥成名，問可有再煲給蕭正楠食？翠如說：「我病咗，佢今日煲番畀我食。（點解喺節目煲粥煲到喊？）因為好感動，連講嘢直接嘅黃宗澤同吳卓羲都讚喎！（煲粥煲到去紅棉道？）總之我哋有我哋嘅節奏，暫時係未有節奏呀！」
陳曉華變「熊貓」
有指她於康樂園置業作嫁妝，翠如澄清：「嗰日我係去搵田蕊妮，試過我哋去食飯，搞到原本有嘢做嘅杜汶澤，要放低手頭工作返嚟煮飯。坦白講，蕭正楠有物業，我都想買番層，但太貴暫時冇睇。」
至於陳曉華、鄧卓殷及丁子田談到護膚心得，不約而同大笠高帽，互讚皮膚好，但陳曉華及丁子田指自己黑眼圈太深，鄧卓殷則自爆眉毛太淺色，故一定會化淡妝或戴太陽眼鏡外出。