柏豪心有所屬戴祖儀冧功嘥料
藝人周柏豪、黃錦燊和「星夢」新人戴祖儀等，日前為無綫合拍劇《多功能老婆》開工，劇中演富二代的柏豪，與父親黃錦燊感情疏離，父子連場拗撬，火藥味重，但現實中二人感情要好，因為大家都是NBA籃球迷，柏豪稱首日開工，小休便一齊上網睇球賽，有共同話題，打成一片。
讚合成照神似
現年68歲的黃錦燊，早年從演藝界轉戰法律界，放低演藝工作已17年，最近他應《多》劇總監製陳寶華之邀，出山再演型爸，他亦很適應拍攝工作：「其實法律工作都日夜顛倒，今次好感恩可以選擇我鍾意嘅工作，律師、演戲我都好鍾意，同一班後生仔合作好投契！」他指道具同事將兒時柏豪與他造成合成照，十分相似。
親密戲在心中
劇中祖儀冧爆柏豪，但對方利用她做煙幕，因他喜歡的是楊千嬅，令柏豪與黃錦燊父子常爆衝突。對於處女演出便有機會夥拍男神周柏豪，祖儀坦言開心：「之前同佢去台灣拍MV。（要求有親密戲？）唔敢，收埋喺心度得喇！（對自己演出收貨嗎？）開始有啲緊張，後來做好晒功課就好啲，佢哋都教我點做表情！」
