市集擺賣 SG成員冇影 Jessica：擔心佢哋搞亂檔！

Jessica

Jessica（蔡明思）日前到中環擺市集，一班好友免費幫手做Sales拉客，她開心多謝好友仗義幫忙：「我話如果以後上市，一定會畀個股東佢做，哈哈！」並非首次擺市集的她自言擺檔擺上癮，看到有人試戴就好興奮，見她主動講解又給予意見，即做成第一單交易︰「有啲係專程過嚟搵我幫襯，有啲男客人帶埋女朋友同老婆嚟，好感恩！（SG其他成員會唔會撐場？）我第一次做市集時，佢哋有嚟支持，今次冇特別同佢哋講，地方有限，擔心佢哋嚟會搞亂檔，如果佢哋嚟會好開心嘅。」

Aka愛玩味「好色」

另外，隊長Aka（趙慧珊）昨早以嘉賓身份現身慈善馬拉松，為賽事主持鳴槍儀式及帶領參賽者做熱身。讀書時代是學校田徑隊代表的她，短跑和跳遠拿過不少獎項，笑言現在年紀大，比較愛慢跑，問到會否找個都愛運動的男友，她說：「男仔唔一定好大隻，有做運動、有少少肌肉、對身形有要求，我都特別欣賞。」

談到好姊妹Jessica再在市集擺檔，Aka指上次開檔有去支持及幫襯：「佢好好有送畀我哋，上次我仲好過分要咗佢一副好貴粉紅色面嘅眼鏡，好靚o架！我成日戴住，希望佢再有多啲唔同款同顏色嘅眼鏡，撞色襯色都好啱，玩味好重。（會唔會喺生意上合作？）我自問未夠班，做生意好難，我唔識，要請教吓佢。」

Jessica擺檔賣個人品牌眼鏡，落力推銷，自己做埋Model添。

Aka為馬拉松賽事主持鳴槍儀式。