陳曉華何泳芍Fit到漏 丁子田自信爆棚冇諗過輸

20位候選佳麗昨日穿三點式亮相作最後衝刺，展現兩個多月的特訓成果。(19)楊帆（Krystal）被選中試戴后冠，由雷莊𠒇親手為她戴上，一嘗戴后冠滋味的她笑言不擔心「魔咒」，問到是否希望今晚再戴后冠？她卻說：「我都想，但信心唔係好大，睇到其他人戴都開心。（唔想贏，嚟識朋友？）都識咗一班好姊妹，加上戴過后冠，都算完成任務。」

唔稀罕爭其他獎

同場有幾位佳麗信心十足，包括參選至今一直走勢凌厲的(7)丁子田（Sara）及(17)陳曉華（Hera），兩人夾擊硬撼擁有「蜜桃胸」及健康膚色的(14)何泳芍（Honey）。Sara自信突出，笑說：「都有信心拎冠軍。（優勝之處？）自己都好Fit，有好嘅身形，有Keep住做運動維持好狀態。」身為大熱的她志在必得，問到勁敵是誰？她說：「冇諗，淨係諗同邊個一齊贏。（拎走冠軍，其他獎由佢哋爭？）都係呀！」同樣Fit爆的Hera則說：「我覺得愈近比賽，狀態愈好！（冠軍志在必得？）我會盡力而為，始終比賽多變數，同埋要睇心情，怕到時太緊張。」提到Sara同樣自信爆棚，她笑說：「佢好有自信，大家有傾偈，我自信心都夠，大家係唔同Style嘅自信。（自信都有分Style？）大家內在同外在都好唔同，佢喺外國讀書，我就係本地女仔。」果然各不相讓！

梁致欣苦練馬甲線，成功突圍。	陳苑澄身材平平無奇，但勝在笑容甜美。	一眾佳麗穿泳裝最後衝刺，今晚就迎來決賽！

梁致欣晒馬甲線搶攻

至於另一位大熱Honey是潛水教練，泳裝環節佔有「主場之利」，她直認泳裝上陣較有信心：「比賽都有好多Part，可能職業關係，着泳衣反而自在啲，不過自信都好重要，我要練好才藝，因為見到其他佳麗嘅才藝表演都好好，盡我能力做到最好，最緊要觀眾睇得開心。」擁有一身健康膚色的她自言已有一班忠實粉絲，難怪信心滿滿：「自己嘅膚色同舊年冠軍雷莊𠒇接近，不過我黑少少，相信呢方面都加分，好多人因為咁樣而認得我同報道我，喺社交網都有同路人打氣，相信佢哋會係我嘅忠實粉絲！」

另外，(3)梁致欣（Jenny）的馬甲線比Honey更搶眼，加上成功谷胸，身形相當吸睛！她透露有請私人教練積極操Fit：「自己有做Gym，但最近綵排太忙冇時間，好彩啲肌肉仲喺度。我對自己嘅身材都有信心，比較鍾意有線條。泳衣會比較有信心，因為有腹肌，令到身形比例同線條靚啲！」