湯鎮業孖仔笑老竇肥神同步甩轆
資深藝人湯鎮業的一對孖仔湯君慈及湯君耀，最近簽約成為甄子丹旗下藝人進軍娛樂圈，問到老闆跟爸爸誰較靚仔？細佬湯君耀即賣口乖指不相伯仲，哥哥湯君慈卻爆出一句：「湯鎮業依家肥番少少……」
湯君慈與湯君耀首部電影《大師兄》即將上映，兩兄弟日前接受東網巨星節目訪問，與C Allstar監製阿簡的一對孖仔Bass及Boss一同挑戰「心靈相通」大考驗，兩對孖仔在現場打成一片！君慈與君耀要隔住塊布做出指定人物動作，抽到題目「米高積遜」時，兩兄弟神同步動作一致，題目轉成「甄子丹」時卻各有各做，場面搞笑。隨後二人接受快問快答挑戰，問到甄子丹與湯鎮業誰較靚仔？細孖笑說：「兩個都靚仔，不相伯仲！」大孖卻說：「湯鎮業依家肥番少少，有成熟味！」
問到應如何分辨二人？君慈指透過面形就分得出：「我面形比較瘦啲、窄啲。」又指與細孖性格截然不同：「最大分別係我較鍾意成熟嘅嘢，包括興趣同着衫，細佬鍾意打機。」君耀則說：「我高佢少少，佢大隻啲，大隻嘅係哥哥，瘦啲嘅係細佬。」
食自助餐有着數？
兩兄弟更大爆小時候跟爸爸食自助餐的趣事，君慈笑說：「細個時爸爸會帶我哋去食自助餐，記得有一次係我哋其中一個入去食咗先，另一個就喺出面等，隔咗一陣食飽嗰個出番嚟，另一個就入去食。」但大呻孖仔都有壞處：「做錯事就一齊鬧，大家當咗係同一個人。」
